Nomipa 21:10 - 15

Kaveinga: " KO 'ETAU FONONGA′, KO E HIKIHIKI TENITI PE KI HE LANGI."

Sifita: Ko e ‘ILO keu TUI ki ai.

‘Oku toutou hā ‘a e ngaahi fo'i LEA ko eni′, " Pea TUKU FONONGA atu....Pea nau TUKU FONONGA atu....Pea nau FONONGA mei ai....Na'a nau FONONGA mei ai." Ko e ‘ILO leva eni Ke u TUI ki ai′, ‘i he aho ni....‘Oku ‘i ai e fu'u Ivi Malohi ‘o e NGATA PALASA′ ki he Fononga ‘a e Kakai ni. ‘Oku te'eki ke 'i ai ha fu'u HIKI lahi mo vave pehe ‘i he 'enau Fononga′, he ko e angamaheni′, ko ‘enau a'u pe ki he Feitu'u kuo 'osi 'i ai pe faingata'a ia e hoko, pea hoko ai pe mo e Launga mo e Hanu pea mo e Ta'efemahino'aki mo e Otua′ ‘o iku mole ai ha ni'ihi honau Kaunga Fononga.′

Aneafi′ ‘i he faka'osi e veesi 9...pea ne fakasio ki he NGATA PALASA, na'a ne MO'UI ai.

Kaunga Tisaipale, ko e TAUMU'A ‘a e ‘Otua′ ki he ‘etau Fononga′, ke HIKI mei he Tu'unga ki he Tu'unga. ‘Oku ‘ikai ko 'eku Hiki mei Tonga ki Fisi, pe ko 'ete hiki mei ha kolo ki ha kolo, pe hiki mei he Lakanga ki he Lakanga, 'IKAI 'AUPITO! IKAI, ko e hiki ‘a e Mo'ui mei he Levolo ‘aneafi′ ki ha levolo ‘oku toe ma'olunga ange, Ko e hiki′ ko e LILIU, ko e hiki′ ko e MAVAHE...ko ‘eku kii fakatātā eni: " kapau na'e ikai pe ke u tokanga au ke u lau Folofola he pongipongi′, pe ‘oku ou fa'iteliha pe au hoku taimi lau Folofola′...pea kuo a'u mai ki he taimi kuo u ongo'i kuopau ke u Lau Folofola, pea kuopau ke u 'ā he 6:00 am ‘o lau Folofola...ko 'eku fo'i fai ko ia ‘a e Lau Folofola′ ko e HIKI ia ‘oku ‘uhinga ki ai ‘a e ‘Otua′." Pea ko e hiki ko ia′, ‘oku ‘ikai toe malava ia I ha ME'A ka ko e IVI pe ‘o e KOSIPELI′, ( Ngata Palasa )pea ko e ma'u e ivi koia 'e ma'u ia he TUKUPA ‘oku LOLOTO.

Na'a ku lave ki ai ‘aneafi, ko e Ha'u ki he ‘Otua′ ‘o Fakaha ko e Angahala kita, Fakatomala pea Vete (1Sione 1:9).

‘Oku mahino mei he Folofola′ na'e ikai te nau hiki fakalaka mei ha feitu'u ki ha feitu'u, ka na‘e pau pe ke FOKOTU'U ho nau Teniti′ ‘i he Feitu'u kotoa ne nau a'u ki ai′ ‘o Fakatatau ki he Mape Folau kuo 'osi Tu'utu'uni mo kinautolu, pea ‘oku ikai 'asi mai ha toe fakaikiiki ‘o ha me'a na‘e hoko ke toe fakatuai'i ‘enau Fononga′ pea ‘oku mahino leva ko e lava pe Kaveinga ‘a e ‘Otua‘ ‘i ha feitu'u pea ko ‘enau hiki ia mei he Potu ko ia′ ‘o ‘ikai ha toe 'ā'āmio holo. ‘Oku tui ‘a e Motu'a ni, Kau Tisaipale mo e Kainga Mo'ui Fo'ou, ko e Tu'unga Totonu ia ‘o e Fononga mo e Otua′. ‘Oku ‘ikai ha feitu'u ia pe ha taimi te tau mavahe ai mei he faingata'a′, ka koe'uhi ‘oku tau Fononga mo e Otua, ‘oku Taki e Otua′, ‘oku Fakamalumalu, ‘oku ne Tauhi, ‘oku ne Malu'i, ‘oku ne 'Ofa'i kitautolu 'aki 'Ene 'ofa ta'engata pea kuopau ke tau Falala kakato ki ai ka e faingofua mo vave ‘a e HIKI FONONGA ‘oku tau fai, pea ko e ha ‘oku tau toe faifai loto ai? Ko e ha ‘oku tau toe hanu ai mo launga?

Ko e Taumu'a ‘a e ‘Otua′ ki hono Kakai′ ki he Fonua na'e Palomesi ki ai′, pea kuopau ia ke hoko, ka e hoko pe ki he kakai ‘oku TUI PIKITAI ki ai, ko e Mo'ui Ta'engata′ kuo 'osi PALOMESI ‘a e ‘Otua 'ia 1Sione 5:11 - 12...." pea ko eni ia ae Fakamo'oni KUO FOAKI ‘e he ‘Otua′ kiate Kitautolu ‘a e MO'UI TA'ENGATA′, pea ko e Mo'ui ko ia′ ‘oku Tu'u ‘i hono 'ALO, ko ia ‘oku ne ma'u e 'Alo ‘oku ne Ma'u e Mo'ui, pea ko ia ‘oku ‘ikai te ne ma'u e 'Alo′ ‘oku ‘ikai te ne ma'u ‘a e Mo'ui." Pea ne pehe mai leva 'i he veesi 13..." Ko e ngaahi me'a ko eni′ kuo u tohi atu kiate kimoutolu koe'uhi ke mou ‘ilo ‘OKU MOU MA'U ‘a e Mo'ui Ta'engata, 'io 'a kimoutolu ‘oku TUI PIKITAI ki he HUAFA ‘o e ‘ALO ‘o e ‘Otua. Kuo u kau Fakataha mo e Folofola ‘o e pongipongi ni kainga ko e Mo'ui Ta'engata′ ko e mo'ui ‘oku hiki mei he Kelesi ki he Kelesi, 'io, na‘e Lea ki ai a Sisu ki he Fefine Samelia..." ‘oku mapunopuna ‘o iku ki he Mo'ui ta'engata." Pea ko e mo'ui ia na'e ha'u mo Sisu 'ia Sione 10:10...Mo'ui Lahi 'Aupito...Ko e ha e Taumu'a ‘a e ‘Otua ki he Tisaipale? MO'UI LIULIUNGA ( Hikihiki Teniti ).

Ko e ha e Founga e LAVA ai?

Himi 383.

Keu I he Eiki pe!

'E taumaia ke fai!

Ko Hevani ae Lea koia

Ki hoku 'Atamai.

He mo'u fononga au,

Kau hangahanga fai,

O HIKIHIKI TENITI,

O fai ki Hevani.

Keu ihe Eiki pe!

Si'i Tala'ofa ia,

Te te kaveinga 'aki pe

Kae'oua ke u a'usia.

He mo'u Fononga au!

Kau hangahanga fai!

O HIKIHIKI TENITI

O fai ki Hevani.

KE U IHE 'EIKI PE, KE U IHE 'EIKI PE!

'Ofa lahi atu, pea ke mou ma'u ha Sapate Fiefia mo Kelesi'ia I he hiki fononga mei ‘Okatopa ki Novema.

Fakafeta'i ki he 'Eiki.